މާލެއަށް ގަޑިއަކު 62 މޭލު ބާރުމިނުގައި ވައިޖެހި ބޮޑެތި ހާދިސާތަކެއް ހިނގައިފިއެވެ.
މިއަދު މެންދުރު ފަހު އައި ބާރުގަދަ ކޮޅިގަނޑުގައި މާލޭގެ އެކި ސަރަހައްދު ތަކުގައި ތަފާތު ހާދިސާތައް ހިނގާ މާލޭ ކައިރި ހިސާބުތަކުގައި ކަނޑުމަތީގެ ހާދިސާތައްވެސް ވަނީ ހިނގާފައެވެ. ސަންދާނަށް ހަބަރު ލިބިފައިވާގޮތުގައި ކޮޅިގަނޑުގެ ބާރުމިނުގައި ބައެއް ގޭގެ ފުރާޅު އެއްލާލާ ބައެއް ގަސްތައް ވެއްޓިފައިވެއެވެ. އަދި މީގެ އިތުރުން ޖެހުނު ގަދަ ވައިގެ ސަބަބުން ބައެއް ގެތަކުގެ ފުރާޅުތަކަށް ތަފާތު ސާމާނު ވަޔާ ވެއްޓި އެކު ވަރުގެ ގެއްލުން ލިބިފައިވެއެވެ. އެންމެ ގަދަޔަށް ވައިގަދަވި ވަގުތު މާލޭގެ ވަށައިގެން ބަހައްޓާފައި ހުންނަ ބައެއް ގާޑިޔާތަކާއި ސައިކަލުތަކަށް ވަނީ ގަދަ ވަޔާއި އެކު ވެއްޓި އެކި ވަރުގެ ގެއްލުންތައް ލިބިފައެވެ. ހަބަރު ލިބިފައިވާގޮތުގައި ކޮޅުވެއްޓި ގާތްކުރާ ޖެޓީ ސަރަައްދުގެ ވެލިގަނޑު ދަމާގަނެ އެސަރަހައްދަަށް ބައެއް ގެއްލުން ވަނީ ވެފައެވެ.
"ކަނޑުމަތީ ހިނގި ހާދިސާތަކަށް ބަލާއިރު މިއަދު ކުރި ވިއްސާރައާއި ކޮޅިގަނޑުގައި ޖެހި ށ ފޯކައިދޫ ދޯންޏެއް ހިންމަފުށި ކައިރިއަށް އަޑިއަށް ގޮސް އޭގެން ދަތުރުކުރި މީހުން ކަނޑުވެފައިވެއެވެ. ކަނޑުމަތީ ލައިފްޖެކެޓް އަޅިއިގެން ތިބޭތާ 4 ގަޑިއިރު ފަހުން ސަލާމަތްކުރި އެންމެންގެ ހާލުވެސް ރަނގަޅުކަމަށް އައިޖީއެމްއެޗް އިން ހާމަކުރެއެވެ. މިހާދިސާގެ އިތުރުން މާލެ ސަރަހައްދުގައި ދަތުރު ކުރި ގިނަ ދޯންޏަކަށް ވަނީ ކޯސްޓުގާޑްގެ އެހީތެރިކަން ފޯރުކޮށްދޭން ޖެހިފައެވެ. އޭގެ ތެރޭގައި ވައިގަދަވެ ފަޅުގައި އަޅާފައިވާ ބައެއް ދޯނިތަކަށްވެސް އެކިވަރުގެ ގެއްލުން ލިބިފައިވާކަމަށް ރިޕޯޓްކޮށްފައިވެއެވެ. ވިލިގިލި ފެރީއާއި ހުޅުލެ އަދި ހުޅުމާލެ ފެރީގެ ދަތުރުތަކަށްވެސް މިކޮޅިގަނޑުގެ އަސަރު ވަރަށް ބޮޑަށް ކޮށްފައިވާކަމަށް ހަބަރުލިބެއެވެ.
އެމްއެންޑީއެފް އިން ފާހަގަ ކުރެއްވި ގޮތުގައި މިއަދަކީ މިއަހަރުގެ މިހާތަނަށް އެއްދުވަހާއި އެންމެ ގިނަ ހާދިސާ ހިނގި ދުވަސް ކަމަށެވެ. މާލޭގެ ސަރަހައްދުތަކަށް އާންމުކޮށް 30 މޭލުގެ ބާރުމިނުގައި ވަޖެހޭއިރު މިއަދު ވައިގެ ބާރުމިން 62 މޭލަށް އައިއިރު މެޓުން ހާމަކުރާ ގޮތުގައި މިއީ 'ހުޅަނގު މޫސުމުގެ ވިއްސާރަ' ކަމަށާއި މިއީ 'ތޫފާނެއް ނޫން' ކަމަށެވެ.
